كيف تكتشفين عيوب خطيبك قبل فوات الاوان؟
ده العنوان وقبل ما ادخل في التفاصيل احب اقولكم ان مافيش اي مشكلة في الانفصال اثناء فترة الخطوبة
لكن المشكلة الحقيقية هي الانفصال بعد الجواز وبتكون مشكلة اكبر لو نتج عن الجواز اولاد
وبيكون الانفصال دايما نتيجة اننا بنكتشف عيوب في شريك حياتنا كانت مش ظاهرة لينا
او احنا تجاهلناها وبعد كده اثرت على حياتنا وتؤدي للانفصال لا قدر الله
عشان كده تعالوا نتعرف مع بعد على بعض العيوب الخطيرة وازاي تكتشفيها قبل فوات الاوان ..
1- كيف يتصرف عند اي خلاف بينكم ؟
العلاقة بين اي زوجين لا تخلو من الخلافات وتقريبا الخلافات دي مش بتكون موجودة بكثرة اثناء الخطوبة لانها اكتر فترة رومانسية بين الطرفين ولكن مافيش مانع ان احيانا بتحصل مشادات كلامية بينكم او خلافات ودي بتوضح ليكي جزء مصغر من صورته في الخلافات بعد كده ركزي في رد انفعاله بعد اي مشكلة بينكم وشوفي هل دايما بيدافع عن نفسه ويوجه ليكي اللوم ولا بيشعر بخطئئه وبيعتذر حددي خطيبك اي نوع منهم
وبعد كده شوفي انتي متقبله شخصيته الانفعالية ولا لاء
2- هل هو متعاون ؟
طبعا دلوقتي اغلب الستات بتشتغل ولابد ان يكون الزوج فيما بعد متعاون
ومش من العدل ان الزوجة تعمل خارج البيت وداخله كمان
فمن الضروري ان يكون خطيبك متقبل من البدايه فكرة تعاونه معاكي في شئون المنزل
وعشان كده لازم تعرفي خطيبك متقبل الفكرة من البداية ولا لاء
وعليكي انتي تحددي هل انتي موافقه لو كان مش متقبل فكرة التعاون ولا لاء
3- مدى غيرته عليكي
الغيرة مطلوبه وبتعبر عن الحب ولكن احيانا بتكون غيرة مرضية
هنا لابد من اننا ناخد وقفة .. فالثقة هى اساس العلاقات الزوجية الناجحة وبدونها تصبح الحياة الزوجية مهددة بالفشل
وفي فترة الخطوبة بتحصل مواقف كتيرة بتوضح مدىغيرة خطيبك واذذا كانت مرضية ولا عادية
4- استعداد خطيبك للتنازل عن رأيه او فرضه بالقوة
دي نقطة مهمة جداا لازم تاخدي بالك منها ولازم تلاحظي هوه من اي نوع
شوفي في موقف رد فعله ايه وهل بيكون متشبس برأيه حتى لو كان غلط وعاوز يفرض رأيه وخلاص ولا عنده استعداد للتفاهم ولو رأيك صح مافيش مانع يتقبله ؟ لا زم تحددي هوه اي نوع من البدايه وتحددي تقبلك لشخصيته من عدمه
5- هل طموحه يناسب طموحك واحلامك ؟
طبعا في بنات كتير بتكون طموحه وعندها احلام وتطلعات كتيره اوي واحيانا بيكون الطرف الاخر
او الخطيب على العكس
يعني بيكون طموحه محدود واحلامه بسيطة وده بيسبب مشاكل فيما بعد كبيرة جداا
عشان كده برضوا لازم تحددي وتعرفي اذذا كان طموح ولا لاء وده بيظهر في كلامكم
6- هل يشاركك اسراره وهل هو صريح ؟
اهم نقطة هى الصراحة بين الزوجين ولازم من البداية كل طرف يكون صريح مع التاني عشان بعد كده لو في سر انكشف بتحصل على اساسه مشاكل كبيره
حاولي تعرفي من خلال تعاملك معاه اذا كان صريح ولا حويط وغامض
اتكلمي معاه كتير وحاولي تعرفي اذا كان بيحكي كل حاجة بدون كذذب ولا بيخبي وكلامه مش واضح
7- هل هو اجتماعي وبيحب الزيارات ؟
طبعا دي كمان نقطة مهمة لاننا بعد الزواج بيلزمنا الامر لزيارات او بنستقبل في بيتنا زيارات
واغلبها بتكون في محيط الاسرة والاهل
ولو الخطيب مش اجتماعي تأكدي انه بعد كده هاتكون في نقطة خلاف بينكم
...............................
وبعد السبع نقط اللي طرحتهم عليكم لازم كل واحدة مخطوبة تفكر كويس وتحدد خطيبها شخصيته ايه
وهل هيا عندها استعداد انها تقبله بشخصيته ولا لاء
وتحدد ده من البداية افضل ما تكتشتكي بعد الجواز وتحصل مشاكل تؤدي للانفصال لا قدر الله
مع تمنياتي لكل المخطوبات بفترة خطوبة سعيدة وربنا يجمع بينكم وبين خطابكم على خير